Қыркүйек айының 22-24 жұлдызы аралығында С.Қожамқұлов атындағы Жезқазған қазақ музыкалық-драма театрында, ҚазКСР халық артисі, Социалистік Еңбек Ері Серәлі (Серке) Қожамқұловтың 125 жылдығына арналған Қазақстанның еңбек сіңірген қайраткері, "Тарлан" сыйлығының лауреаты, көрнекті режиссер Жанат Әубәкірұлы Хаджиев атындағы театр форум-фестивалі басталды.

Форум-фестивальге театрымыздың Әдеби-драма бөлімінің меңгерушісі Нұркен Тұрлыбек, актерлер Бауыржан Манатбекұлы, Рахат Жұмаханов, Нұржан Әбіласан қатысуда.

Ұйымдастырушы театр ұжымы мамандардың заман талабына сай кәсіби шеберліктерін арттыру мақсатында Павлодар, Ақмола, Қостанай, Шымкент, Көкшетау, Қызылорда, Өскемен, Қарағанды театрларының актерлерін қонақжайлылықпен қарсы алды.

Форум-фестивальдің негізгі мақсаты:
Өнер ұжымдары арасындағы байланыс пен ынтымақтастықты әрі қарай дамыту, тәжірибе алмасу, театр мәдениетін өзара байыту, шығармашылық қатынасты нығайту;
Форум-фестивальге қатысушы театрлар мен сыншылар, өнертанушылар арасында тығыз шығармашылық байланыс орнату болып табылады.

Сонымен қатар, форум -фестиваль кезінде актер шеберлігі, сахна қозғалысы және сайысы, сахна тілі бағыттары бойынша шеберлік сыныптары мен тренингтер, конференция сабақтары өткізіледі.

ҚР Тәуелсіздігінің 30 жылдығына және Ш.Құсайынов атындағы Ақмола облыстық қазақ музыкалы драма театрының 25 жылдығына орай  ұйымдастырылған волейболдан өткен  турнирде Ж.Аймауытов театрының  "Ертіс-Баян" командасы Бас жүлдені қанжығасына байлады.

ҚР Тәуелсіздігінің 30 жылдығына және Ш.Құсайынов атындағы Ақмола облыстық қазақ музыкалы драма театрының 25 жылдығына орай өтіп жатқан  ІІІ аймақаралық  фестиваль аясында көрікті мекен Бурабайға ұйымдастырылған экскурсия!

Бүгін қазақ театр өнерінің корифейі, ардагер актер, Ж.Аймауытов театрының негізін қалаушылардың бірі, «Ерен еңбегі үшін» медалінің иегері, ҚР еңбек сіңірген қайраткері Сейітжан Айтқожаұлы Тәжібаевтың өмірден озғанына қырық күн толуына орай театр ғимаратында еске алу кеші өтті.

Еске алу кешіне марқұмның туыс-туғандары мен дос-жарандары және әріптестері жиналып, естелік әңгімелерімен бөлісті.

Сейітжан Айтқожаұлы саналы ғұмырын сахна өнеріне арнаған дарабоз актер, талант иесі еді. Жарқын бейнесі жүрегімізде сақталып, өмір жолын жадымызда тұтпақпыз!
Жатқан жері жарық болып, жаны пейіштің төрінде шалқысын!